Hindi Blogs

Entrepreneur hone ka pressure kaise handle kare?

Entrepreneur hone ka pressure kaise handle kare?

Bohut se logo ko lagta hai ki entrepreneur banna bahut hi aasaan hai. Isiliye to bahut kam log entrepreneur bante hai aur jyaada log jobs karte hai. Agar aap pressure jhel nahi sakte to aap entrepreneur nahi ban sakte. Sirf business nahi koi bhi line dekh lijiye chahe entertainment ho, job ho, sports ho pressure jo acche se handle kar gaya to samjho usne apni vijay gaatha likh li. Ab pressure bahut tarah ke hote hai jaise.

Peer pressure – Aapke dost life me tezi se tarraki kar rahen hai par aap dheemi gati se. Is ek mansik pressure se har insaan guzarta hai aur bahut se log is pressure ko kaabu me nahi kar paate. Is pressure ko kaabu me karne ke liye soch me badlaav ki zarurat hai. Sabse pehle to apne aap ko kisi se compare karna chodiye. Compare ek hi aadmi se kijiye wo aadmi hai aap khud. Khudko dekhiye mai kahaan tha aur kahaan aa gaya hu. Apne man me apne liye ek goal set kijiye ki mujhe 2 saal me ye banna hai ya itne paise chahiye to iskeliye mujhe kya kya karna hoga aur wah kijiye. Mehnat ke bina kuch bhi haasil nahi hota.

Personal life pressure – Har kisi ki life me personal problems to hoti hi hai. Kuch logo ki choti problems aur kuch logo ki badi problems. Ye apna apna bhaagya hai par isse upar aane ke liye jo cheez chahiye wo hai will power. Will power ka matlab hai ikchaa shakti. Jab mai personal problems ki wajah se depress ho jaata hu to mai kuch der ke baad aisi cheez imagine karta hu jisse mujhme will power phir se jaag jaati hai. Kathin lamho ko jeetne ke liye aap kuch der baad positive cheeze sochiye. Direct positive cheeze sochna mushkil hai par dheere dheere ek link banakar sochiye. Jaise mai sochta hu ki yeh sab problems temprory hai kuch dino ke liye, kuch dino baad sab thik ho jayega. Agar aaj maine depress hokar mehnat chod di to kal jab personal problems nahi rahenge tab pachtaunga ki kaash us waqt mehnat ki hoti to aaj mere paas man chahe paise hote. Is liye koi bhi mauka koi bhi business deal depression ke kaaran gawaana mat. Gawa bhi diya to pehle se double mehnat karke phir se haasil kar lena.

Deal cancel hone ka pressure: Business me ye cheez bahut hoti hai doston. Koi aapko order dene hi waala tha ki ain mauke par cancel kar diya aur aap nirash ho jaate hai pressure me aakar. Aise case me aap yeh sochiye ki aisa kya kaaran hai jiski wajah se yah deal cancel hui hai. Agar wo karan aapke control me hai to use sudhaariye jaise ki product delivery time waghera waghera lekin agar control me nahi jaise buyer ko uski ab zarurat hi nahi to kuch kar nahi sakte. Rules ke mutabik chaliye. Hamesha prepared rahiye aur sochiye ki sabse bura kya ho sakta hai is case me aur use kaise handle karenge.

Apne competitors ka pressure: Aapki business line me koi competitor acchi business strategy ke saath aata hai to phir aap pressure me aa jaate hai. Ab aise case jo bhi aapke control me hai wo kijiye jaise us business strategy se koi aur accha business stratergy lekar aaiye. Jo cheez aapke control me nahi hai us par soch kar samay wyarth mat kijiye. Jaise agar competitor 1 crore rupees lagakar apne business ko expand kar raha hai aur aapke paas 1 crore rupees nahi hai. Itna loan lena aapke liye naamumkin hai to iske baare me sochkar samay wyarth mat kijiye. Aur cheezo ke baare me sochiye jo aap kar sakte hai. Usne aapko paise se maath dene ki koshish ki to aap use kisi dusre tarike se maath dene ki koshish kijiye. Jaise aapke control me hai acchi marketing karna to wo kijiye. Business me kaafi log isi liye fail ho jaate hai ki wah un cheezo par jyaada sochte hai jis par unka koi control nahi hota.

Deadline ka pressure: Kisi ko koi deadline commit kar di hai aur use poora nahi kar paa rahe to pressure me aana natural hai. Kyuki agar koi aapko paise de raha hai to use uska kaam ya product time par dena aapki responsibility hai. Business karna bacho ka khel nahi. Agar deadline ka pressure nahi jhel sakte to ek hi salah dunga ki business line me mat aana. Ye koi aasaan kaam nahi hai. Ham dekhte hai ameer businessmen ko acchi acchi gaadiyon me ghoomte hue par uske peechee ki mehnat ke baare me ham nahi sochte. Ye aisho aaraam asaani se nahi aati hai. Isliye bhai jo waada kiya wo nibhaana padega. Deadline par project ko khatam karo.

Leave a Reply

Your email address will not be published. Required fields are marked *